भारतीय पर्यटकमा कोरोना, नेपाल प्रवेशमा रोक

भारतीय पर्यटकमा कोरोना, नेपाल प्रवेशमा रोक

 

गाेकुलेश्वर । बैतडीमा भारतबाट घुम्न आउने पर्यटकमा कोरोना संक्रमण देखिन थालेको छ। नेपाल–भारत सीमानाका झुलाघाटबाट नेपाल घुम्न आउने पर्यटकमा कोरोना संक्रमण देखिन थालेपछि उनीहरूलाई नेपाल प्रवेशमा रोक लगाउन थालिएको छ।

स्वास्थ्य कार्यालय बैतडीका सूचना अधिकारी विपिन लेखकका अनुसार चारजना भारतीयमा कोरोना पुष्टि भएको छ। झुलाघाट नाकाबाट नेपाल आइरहेका उनीहरूमा कोरोना देखिएको हो।

कोरोना देखिएपछि उनीहरूलाई नाकाबाटै भारत फिर्ता गरिएको छ। उनले भने, ‘सीमावर्ती भारतीय क्षेत्रबाट नेपाल घुम्न आउनेहरूको पनि कोरोना परीक्षण गर्ने गरेका छौं, पोजेटिभ देखिएमा भारततिरै फर्काउने गरिएको छ।’

यसैबीच बैतडी भारतसँग सीमा जोडिएको जिल्ला भएकाले पनि यहाँ कोरोना संक्रमणको जोखिम उच्च रहेको छ। भारतसँग सीमा जोडिएको झुलाघाट नाका भएर फर्कने अधिकांशमा कोरोना संक्रमण देखिन थालेको हो।

झुलाघाटमा हेल्थ डेस्क स्थापना गरेर उक्त नाकाबाट स्वदेश फर्कनेहरूको एन्टिजेन परीक्षण गर्ने गरिएको र परीक्षण गरिएका अधिकांशमा कोरोना पुष्टि हुने गरेको स्वास्थ्य कार्यालयले जनाएको छ। साउन पहिलो सातासम्म कोरोनाका सक्रिय संक्रमित शून्य रहेको बैतडीमा अहिले ३१ जना सक्रिय संक्रमित रहेका छन्।

संक्रमण पुष्टि भएकाहरू समेत सीधै घर जाने भएकाले समुदायस्तरमा फैलन सक्ने जोखिम बढेको स्वास्थ्य कार्यालय बैतडीका प्रमुख योगेशप्रसाद भट्टले बताए। स्वास्थ्यका मापदण्ड पालना नगर्दा झन् जोखिम बढ्दै गएको स्वास्थ्य कार्यालयले जनाएको छ।

जोखिम बढ्दै गएकाले पूर्वतयारीसमेत थालिएको बैतडीका प्रमुख जिल्ला अधिकारी सुरेश पन्थीले बताए। विपद व्यवस्थापन समितिको बैठक बसालेर जिल्लामा पूर्वतयारी थाल्न निर्देशन दिइएको हो।

जिल्ला अस्पतालमा आइसियूसहितका आइसोलेसन सेन्टर, सबै स्थानीय तहमा होल्डिङ सेन्टर, आइसोलेन, क्वारेन्टाइन निर्माण, कोरोना कोष स्थापना, एम्बुलेन्स तयारी अवस्थामा राख्न, कोरोनाविरुद्धको खोप लगाउन छुटेकालाई खोपको दायरामा ल्याउने लगायत निर्णय गरिएका छन्।

जिल्ला विपद् व्यवस्थापन समितिको बैठकले कोरोनाको चौथो लहरको जोखिम बढेकोले त्यसबाट बच्नका लागि आवश्यक सतर्कता अपनाउने निर्णय गरेको जिल्ला प्रशासन कार्यालयले जनाएको छ।

बैतडीमा हालसम्म ३ हजार ३७४ जनामा कोरोना संक्रमण पुष्टि हुँदा संक्रमणकै कारण १९ जनाको ज्यान गइसकेको छ।

Leave a Reply

Your email address will not be published. Required fields are marked *

तपाईंलाई यो समाग्री कपी गर्न बन्द गरिएको छ। यसका लागि चौलानी खबरसँग अनुमति माग्नुहोस्।